കടം വീട്ടാതെ കല്യാണം കഴിക്കരുതേ...

കിട്ടാക്കുറ്റി പണം തിരിച്ചു വാങ്ങാന്‍ പറ്റിയ സമയം കല്ല്യാണ മുഹൂര്‍ത്തം തന്നെ. ഇതാ സൗദി അറേബ്യയിലെ മദീനയില്‍നിന്നൊരു രസകരമായ സംഭവം. കൂടെ ജോലി ചെയ്യുന്ന സുഹൃത്തിന്‌ കാര്‍ വാങ്ങാന്‍ യുവാവ്‌ ജാമ്യം നിന്നതാണ്‌ പൊല്ലാപ്പായത്‌. കാറിന്റെ തുകയില്‍ 15,000 റിയാല്‍ സുഹൃത്ത്‌ അടച്ചില്ല. ഇതേത്തുടര്‍ന്ന്‌ കാര്‍ കമ്പനി ജാമ്യക്കാരനില്‍നിന്ന്‌ തുക ഈടാക്കി. തുക തിരിച്ചു കിട്ടാന്‍ സുഹൃത്തിന്റെ പിറകെ നടന്നെങ്കിലും ഫലമുണ്ടായില്ല. ആയിടക്കാണ്‌ സുഹൃത്തിന്റെ വിവാഹം നിശ്ചയിച്ചത്‌. സഹപ്രവര്‍ത്തകനെ കല്യാണത്തിന്‌ ക്ഷണിക്കുകയും ചെയ്‌തു. കല്യാണ മണ്ഡപത്തിലെത്തിയ യുവാവ്‌ നവവരനെ സമീപിച്ച്‌ സ്വകാര്യം പറഞ്ഞു. 15,000 റിയാല്‍ ഇപ്പോള്‍ കിട്ടണം. ഇല്ലെങ്കില്‍ പത്ത്‌ മിനിറ്റിനകം പോലീസെത്തി താങ്കളെ കൈയാമം വെച്ച്‌ കൊണ്ടുപോവും. പരിഭ്രാന്തനായ യുവാവ്‌ കല്യാണ പന്തലില്‍ പരക്കം പാഞ്ഞ്‌ നിമിഷങ്ങള്‍ക്കകം പണം തരപ്പെടുത്തിക്കൊടുത്തു. കല്യാണ ചടങ്ങ്‌ മംഗളമായി പര്യവസാനിക്കുകയും ചെയ്‌തു.